Sparnaðurinn hverfur og eignirnar rýrna...

 

Við erum nokkur sem höfum lagt fyrir í viðbótarsparnað frá byrjun.  Það kemur sér vel núna þegar verðbólgan er að éta upp eignahlutinn í eignum okkar, hækka afborganir og háir dráttarvextir ofan á vexti og verðbætur sem gera okkur erfitt með að standa í skilum.  Allt hækkar nema launin.

Það er gott að hafa viðbótarsparnaðinn að hlaupa uppá, ég sé hann núna sem vin í eyðimörkinni.

Það kemur mér á óvart að sjá hvað mikið var um útlán hjá bönkunum 2008 til ákveðinna aðila. 

Skil núna af hverju var sagt nei og aftur nei við almenning, það var búið að þurrausa bankana.

Á ég núna að gera eins og Margeir mælti með;  að breyta erlenda bílaláninu í ISK svo að ég tapi ekki meir.  Eru aðgerðir stjórnvalda til styrktar krónunni og öll sú umfjöllun bara út í bláinn....  Eru þeir bara að lengja í hengingarólinni fyrir okkur landsmenn til að fá atkvæði svo þeir haldi sínum launum og fyrirgreiðslum.

Ég er farin að hafa verulegar áhyggjur, 17 þúsund manns atvinnulausir.  Það voru 180 þúsund manns vinnandi síðasta sumar.  Núna eru þeir semsagt um 165.000 þúsund, þar af 123.000 í fullri vinnu rest í hlutastarfi. Landsmenn eru um 319 þúsund, ef þetta er rétt þá kemur í ljós að einn maður þarf að vinna fyrir tvo.  

Staðan virðist vera þessi núna og hún er slæm, auk þess sem vinnandi fólki fer fækkandi.  Hver á að borga allar skuldirnar sem bankakerfið safnaði?   Það þarf heilstæða aðgerðaráætlun og hvernig á að bjarga heimilunum og fólkinu sem missti vinnuna út af óstjórn og vanhæfi fárra manna.

Ég rak augun í það um daginn að eignir íslendinga í skattaskjólum hafa 4000 faldast á nokkrum árum. Svo er listinn orðinn langur af félögum sem hafa orðið gjaldþrota þrátt fyrir milljarða fyrirgreiðslu og enginn í ábyrgð.  Við almenningur höldum að viti bornir menn séu við stjórn og þeir hugsi um hag landsins. Nei það er ekki verið að sækja þessa peninga, heldur er verið að leggja blaðamenn í einelti sem eru að veita okkur upplýsingar um lánafyrirgreiðslur, og talað um bankaleynd.  Við eigum að greiða þetta, við almenningur - við eigum rétt á að vita hvað var gert við þá fjármuni sem við eigum að greiða.  FME þarf að fara að taka á því sem skiptir máli og sækja eignir sem voru teknar úr landi með hjálp bankamanna sem voru að hugsa um skammtímagróða.

Hvenær á að taka á þeim málum?

 

 

 

 

 

6.700 umsóknir hjá Nýja Kaupþingi